2011年4月30日, 我踏上航機, 一個人嚟到一個悉尼, 展開新嘅一頁, 刺激, 新鮮, 又擔心; 不過當時真係覺得, 車, 人一世, 物一世, 乜都試下。真係唔得嘅, 咪返香港囉。

而家諗返起, 確實覺得自己好勇, 無朋友無親人無喺度讀過書同做過嘢。不過, 深信個天會看顧, 因為我嘅僅僅願望, 係用自己嘅社工專業去幫人, 其餘嘅, 我交俾天主。

人生係充滿好多嘅可能性, 某一啲位, 你總要做選擇, 有兩個截然不同嘅方向與可能性。

如果我當年繼續讀, 應該係一個牙醫, 唔係社工。

如果我當年繼續喺社署做, 應該有機會升職, 要不然可能會做性治療嘅 Private Practice。

如果我當年無咁多顧慮同怕改變, 可能攞咗個 Scholarship 去英國讀 Forensic criminology。

如果我當年接咗個 Offer, 可能今日已經讀完 UC, California State U 或者 San Jose 嘅U, 唔係成立悉尼菠蘿谷, 係矽谷嘅菠蘿谷。

如果當年UWA個 Doctor of Social Work course 開得成，我嘅根，應該唔係喺東岸而係西岸。

不過，我又唔會後悔，回頭唉聲歎氣先至笨，以上所有嘅，看似唔錯嘅選擇，但無人敢寫包單一定好過今日。過咗就算。因為唔會回頭看，所以全情投入，只會往前走。

十一年渡過，有唔少挑戰、苦頭、難關、試煉、失望。不過我好感恩有好多學習嘅機會，識咗好多唔同嘅人，試過好多唔同嘅嘢。如果你問我有無難過嘅日子，當然有啦。只不過我嘅 Bounce Back 能力同忘記能力都唔太弱，瞓多幾覺可能都唔太記得，又或者，因為有好多嘢 Occupy 嘅時間，唔開心實在係太奢侈同嘥咗啲時間。

從來無諗過識揸車，但又無諗過一宗交通意外，差啲連入籍也搞唔掂。

我呢個由細乖到大，女校長大嘅人，一路都走大部份人走嘅路，打份穏定嘅長工；竟然會有天覺得，呢個唔應該係唯一選擇，於是打幾份工，咦，咁啱又對號入座咗香港嘅潮語「斜棟人」。

以前喺香港時兼職做新娘同舞台化妝，又做唔少婚姻輔導，移民後其實社工嘅職務同香港好唔同，我又做啲管理嘅工作，曾經以為「婚姻」工作應該寫上休止符，點知因緣際遇，因為舊公司嘅原因（當時想搞殯儀服務），結果考咗個註冊婚姻禮儀師資格。Well, 我確實無諗過會喺個大橋前幫人主持婚禮喎。LOL

我由細到大都好怕聽到自己把聲，點知有人話入咪，後來咗電台節目，過咗兩年，我仍然覺得有種疑幻疑真嘅感覺，唔係好肯定，係咪啲人氹我先咁講。

香港社工嘅工作職務及政府與公眾期望同呢度好唔同， 基本上好多嘅都用唔上，喺香港工作最後幾年，其中一瓣我比較多嘅個案係婚姻輔導（可能因為後期修性治療）, 輔導技巧自覺能運用自如同恰到好處，甚至知道大概點可以 engage 到一個唔合作嘅丈夫做輔導（註：通常男士，無論任何文化，都會較難同意婚姻有問題，並要一個「外人」幫手），亦知道大概點樣「搞喊佢地」—透過自發嘅眼淚，表達佢地最脆弱卻也最真摯嘅一面，破冰並更能了解對方。

嚟到澳洲之後，除咗好少部份外，發覺社工根本唔會做呢啲，一下子覺得好似好浪費以前喺個案輔導工作學到嘅積累到嘅經驗。

我確實感覺天主，佢讓我教文憑課程同做社工學生嘅實習督導，將我識嘅傳授俾下一代。

原來，生命裡很多很多嘅嘢，會喺你預料以外，有佢最好嘅安排。

11年前我嚟之前，我希望自己用識嘅言語同文化，去幫有需要嘅人。

我無諗過，2015年成立嘅主谷–菠蘿谷同稍後成立嘅兩個副谷(社福工作人員同幼教從業員)竟然可以幫到啲人走在一起，佢地有啲人成為朋友。

正如當年初心一樣，因為自己嚟嘅時候無人無物好淒涼，希望有個平台，等啲人可以吹下水，知多啲嘢，甚至成為朋友，又更或成為愛侶／家人。一點一滴，我好慶幸，幾個谷算是不錯。亦無諗過香港政治會有一天有重大變化，多咗人嚟澳洲，希望多啲人從中得到鼓勵同慰籍。

11年滿滿嘅呢一日，兩隻跟我移民來嘅貓咪有一隻已經去咗彩虹橋，喺果度等我有一天總會同佢重遇，而家有兩隻化骨龍，再加兩隻寄養嘅貓咪。

我感恩身邊重要嘅朋友，喺唔同場合認識，相遇相知，喺你最難過最需要支持同意見嘅時候，總會喺你左右。

11年後嘅今日，我嘅人工仍未追到喺香港做社工嘅薪酬（確實幾高），無乜得高望重嘅職銜，唔係乜嘢名人，但我算快樂滿足。

或者，我最在意嘅，用新一代社福字詞，係Impact。有差不多七年幾嘅時間，我做義工，去難民中心同Community 探啲疪護簽證，來自戰地國家嘅人士，我唔太需要出名或者有無人當時知又或者有無人讚，我在意嘅係果啲我探過嘅人。

原來，真係慢慢咁變得更好。

2022年嘅今日，希望即將移居嚟嘅人，忘記香港曾經帶俾佢地嘅傷感與難過，喺新嘅國度裡，展開新嘅一頁。

2022年4月30日，我妹妹一家人移居英國，祈望佢嘅日子路會走得比我當年順利。