最近睇一齣電視劇「白色強人II」，佢講到唔少病人，尤其患有罕有病嘅，因為需要嘅藥物，唔喺政府嘅藥物名冊之下，所以，得唔到政府資助。如果要用果啲藥物嘅，就要自己俾錢；但不幸係好多人喺今時今日嘅香港，係負擔唔起。

我記得臨離開香港前果幾年，因為社署嘅工作，令我接觸到唔少低下階層同生活喺貧窮邊緣嘅人，確實係三餐難保，醫病好似成為咗奢侈品。呢個亦係一個原因點解自己當年會修讀性治療，用知識去免費喺輔導裡面提供治療，唔使佢地再要去其他地方俾錢接受治療。

可能天生係個杞人憂天嘅人，乜嘢都會諗得遠；所以，當年見到醫療系統，人口老化，安老院狀況等，覺得真係要移民去一個更加有保障嘅地方。

可幸澳洲同有啲北歐同加拿大都係社會福利比較好嘅國家。

有唔少人當年都話唔想移民，因為好多國家好似澳洲咁，抽稅比重高。

我生活咗咁多年，覺得實在要明白，喺好似澳洲嘅國家裡生活，無錯稅比率係會比香港高， 但係有好多社區設施，空氣，水質，天氣，食物質素，教育，醫療同福利等系統，係喺我地Day 1喺呢度生活已享受緊，不能當理所當然，但要感恩。

記得以前大學讀社工時，有讀過一個概念係Welfare State, 大致嘅意思係，一個社會系統去保障國民嘅健康同身心安康，尤其針對一啲有經濟同社會需要嘅人，而呢一個系統，係透過緊密嘅社會網絡而建成，包括經濟，政治，政策，教育，醫療，社會保障等等。

移民以後，錢難儲咗，不過總體嘅身心靈，都係俾以前喺香港嘅時候好。

賺咗。