“從深入研究舊物嘅過程中，館長希望搵返我哋最引以為傲嘅香港精神，將佢一一透過AR 呈現，令大家牢牢地記住我哋嘅根之餘，以歷史為鑒，以過去成就未來。”

海外香港人製作的 Hong Kong AR Museum，令你可以在 Facebook、Instagram 上使用 Effect，以AR形式還原香港的集體回憶。

@Hong Kong AR Museum
Facebook : https://www.facebook.com/HongKongARMuseum/
Instagram : https://www.instagram.com/hongkongarmuseum/
立即玩所有 Effects (用手機開阿！) : https://linktr.ee/hongkongarmuseum

鬼馬特效搶先玩！

製作人都加入左 immiDaily Discord 啦，會同一眾Group友分享更多屬於香港人的創作。你都快D 加入 immiDaily Discord 移民社群 一齊吹水啦！

六十年代開始，一班匠心獨韻嘅寫字師傅同招牌工匠用一字一筆建構咗最繁榮昌盛嘅香港，令香港喺霓虹燈光下閃耀咗好幾十年。但係好景不常，一個無情嘅安全條例令呢一顆顆霓虹隕落，令一代香港人窮一生經營嘅建設黯然消失。發展同保育真係唔可以並存嗎？(法國同日本都係舉世聞名新舊並存嘅國家呀)

為咗紀念工匠們嘅心血結晶，貓館長以霓虹招牌做主題整咗呢個AR effect，你可以將佢「掛」喺你所在城市嘅地標又得，「掛」喺個頭度或個心度又得，得咗

牢牢的掛住佢記住佢，令香港文化同香港人嘅獨特性長存落去。

有無諗過百幾年前嘅香港人係點抗疫㗎呢? 雖然求神問卜喺今日崇尚科學嘅世代入面好似好天方夜譚咁, 但係喺當年醫學冇咁昌明嘅時候, 宗教就係當時嘅人鞏固信念凝聚社區嘅依歸。貓館長今次就同你從長洲太平清醮呢個香港傳統節日中研究下當時嘅人處理疫情同撫平民怨嘅心態同方法。

1894年, 香港島同離島發生瘟疫死咗好多人, 長洲島個個都人心惶惶, 之後就有位地保叫朱福請咗一眾道教嘅法師去長洲打醮, 祈求北帝指點下啲島民點樣可以令到疫情平息, 之後相傳北帝就”指導”啲人叫啲高僧設壇懺悔, 超度枉死嘅孤魂, 再清潔街道咁先至可以消禍。

得到北帝嘅”指示”, 島民就開始落手落腳咁做嘢, 開始咗為期三日嘅太平清醮: 包括出巡, 超幽同包山三大部份。

出巡就係由島民帶着神像圍住個島行一圈, 有潔淨社區清潔街道嘅意思, 而其中一樣最出名㗎呢就係飄色巡遊, 由小朋友扮演古今人物企喺花車上面繞島而行。

而第二日, 佢哋就會進行”超幽”, 即係超度亡魂嘅意思. 道士們會向亡魂誦經讀文, 然後用一啲預先蒸製好嘅幽包(即係後來好出名嘅平安包）造成細包山供奉佢哋, 再將一啲供品同鬼王神像火化, 象徵要送走佢哋。

到第三日, 島民就會喺北帝廟前搭起竹棚, 將掛滿平安包嘅包山設置喺竹棚入面供奉北帝. 祭祀完畢之後, 島民就會爬上呢啲包山上面搶包, 因為佢哋相信愈搶得多呢啲拜過神嘅包就會越平安。

而喺呢三日入面, 所有人都會進行齋戒唔食肉, 希望可以潔淨身心靈, 用最虔誠嘅心去祈求上天停止瘟疫蔓延。

今年2022年, 原定喺四月初六(即五月頭)舉行嘅太平清醮好諷刺地因為武肺疫情被取消, 但係貓館長好欣賞長洲島民可以眾志成城咁成就呢件社區盛事, 彰顯到香港人嘅團結. 所以雖然今年嘅太平清醮被取消, 但係貓館長就做咗呢個AR game希望大家都可以搶返幾個包, 平平安安咁渡過艱難嘅日子。

唔係化! 香港人連英美軍嘅戰船都造過? 就係咁勁! 仲要唔只一隻, 係好多隻, 而其中最具代表性嘅戰船就係呢隻曾經喺二次大戰代表英國皇家海軍奮勇抗敵嘅李和號~

1942年嘅情人節, 被改裝成巡邏艇嘅李和號被英軍徵召出兵, 去到新加坡海域保衛當時荷蘭藉嘅東印度群島 （即係依家嘅印尼). 一行只有84個軍人嘅李和號, 之前幾日受空軍洗禮本身己經傷痕纍纍, 去到邦加海峽嘅時候仲遇上日軍嘅分遣艦隊. 面對敵眾我寡嘅嚴峻情況, 當時嘅指揮官Thomas Wilkinson, 並無絲毫畏縮, 帶住寧為玉碎不為瓦全嘅氣愧同佢嘅團隊及僅有嘅13發子彈同龐大嘅日軍拚死一戰. 經過一場混戰, 呢隻小船竟然成功擊落其中一隻日軍嘅運船, 導致對家棄船, 之後仲埋身肉搏以僅有嘅兩支機槍攻打敵人. 雖然到最後佢難逃被擊沉嘅命運, 但係佢哋明知不可為以為之嘅事蹟被流傳開去, 最後仲成為英國皇家海軍史上授勛最多嘅戰船添!

講完佢嘅英雄史, 就不得不提製造呢隻李和號嘅黃埔船塢, 唔講唔知原來香港嘅重工業喺開埠初期就已經蜚聲國際, 係當時遠東最大嘅船塢, 除咗為經過嘅船隻維修, 仲製造過大郵輪及幫其他國家製造戰船添, 如果想知多啲可以參考下面佢哋曾經製造過嘅船:

• USS Mariveles (1886)
• USS San Felipe (YFB-12)
• USS Banaag (YT-104)
• USS YAG-3
• USS YAG-4
• HMAS Matafele

雖然依家黃埔船塢已經唔存在, 但係佢曾經寫下嘅光輝歷史同李和號奮勇抗戰嘅事蹟深深咁感動咗貓館長, 所以今次就用佢做主題做咗呢一個AR 展覽, 希望大家可以感受到香港曾經嘅興盛繁華, 記住呢份香港人嘅驕傲。

記得去試玩同埋save低個特效啦！